Райза » 16 мар 2016, 18:11
Мәкәш мәктәбендә осрашыу
Башҡорт теле аҙналығы планына ярашлы, беҙҙә ҡунаҡта ошо мәктәпте тамамлап, БДУ-ла белем алған, бөгөнгө көндә “Заятүләк һәм Һыуһылыу” эпосын өйрәнеүсе, Башҡортостан Яҙыусылар берлеге ағзаһы, милли әҙәбиәт музейы хеҙмәткәре Олеся Әхмәтрәхимова менән осрашыу үтте. Осрашыу, аҙналыҡтың һәр сараһы кеүек үк, Рәми Ғариповтың “Туған тел” шиғырын күмәкләп уҡыу менән башланып, “Түңәрәк өҫтәл” формаһында дауам итте. Уҡыусылар яҡташ шағирә Рәсимә Ураҡсина һүҙҙәренә яҙылған “Олатайым миҙалдары” йырын башҡарып, Олеся Әхмәтрәхимованың шиғырҙарын һөйләп ҡыуандырҙы. Олеся Вәкил ҡыҙы уҡыусыларға Мәжит Ғафуриҙың Өфөләге йорт-музейы тураһында һөйләне, унда үткәрелгән конкурстарҙа ҡатнашырға, экскурсияларға килергә саҡырҙы, викторина үткәреп, башҡорт теле кабинетына китаптар, буклеттар бүләк итте. Күптән түгел үткән “Илһөйәрҙәр” конкурсында ҡатнашыусы уҡыусыларға рәхмәт белдерҙе. Мәктәп директоры Айгөл Камил ҡыҙы уҡыусыларҙы әҙәби китаптарҙы күберәк уҡырға саҡырҙы. Яҡшы уҡыған кешенең һәр эшкә лә өлгәшә алыуын, ваҡытты дөрөҫ ҡулланырға һәм файҙалы эштәргә өҫтөнлөк бирергә кәрәклеген әйтеп үтте. Мәктәпте тамамлаусылар уҡыусылар менән йышыраҡ осрашһа бик яҡшы булыр ине тигән теләктә ҡалды уҡыусылар һәм уҡытыусылар