Габитова З.Г. » 26 фев 2016, 12:29
“БЕР ЙЫРЛАНЫМ ШУЛАЙ, БЕР ИЛАНЫМ...”
(Фәтхелҡадир Сөләймәновтың “Тимербай ҡурайсы” хикәйәһенә концептуаль анализ)
Бикмөхәмәтова Сәүиә Ғәбдрәүф ҡыҙы,
Салауат ҡалаһы «25-се башҡорт гимназияһы»
Дәрестең киңәйтелгән план-конспекты.
Дәрестең темаһы: «Бер йырланым шулай, бер иланым…»
(Фәтхелҡадир Сөләймәновтың «Тимербай ҡурайсы» хикәйәһен өйрәнеү).
Эпиграф:
Үлем юрап көлдө юраусы:
Имеш, һуңғы башҡорт ҡәберендә
Ҡурай уйнар һуңғы ҡурайсы!..
Юҡ, үлмәне халҡым!
Рәми Ғарипов. «Урал йөрәге».
Дәрес барышы:
I. Психологик инеш.
У. - Һаумыһығыҙ, балалар!
Б. - Һаумыһығыҙ, уҡытыусым!
У. - Хәйерле көн, уҡыусылар! Бына беҙ тағы ла үҙебеҙҙең тыуған өйҙәй яҡын кабинетҡа йыйылдыҡ, сираттағы дәресебеҙҙе башлап ебәрәбеҙ. Күпме йыр-моң, туған халҡыбыҙҙың ижад гәүһәрҙәре, яҙыусы-шағирҙарыбыҙҙың аҫылташтай балҡыған әҙәби әҫәрҙәре яңғыраған был бүлмәлә!
II. Мотивация булдырыу.
- Элек һәр өсөнсө башҡорт «Урал батыр» эпосын яттан белгән, тимәк, һәр өсөнсө башҡорт сәсән булған. Мин дә дәресте үҙем яҙған акростих менән башлап ебәрәм. Кемдәр акростихтың нимә икәнен белмәй, аҙаҡ үҙегеҙ ҙә төшөнөрһөгөҙ. (экранда сыға бара).
Алыҫ Төркиәгә китһә лә,
Башҡортлоғон ул онотмаған.
Дуҫы Әхмәтзәки Вәлиди
Уны «арҡаҙаш» тип атаған.
Лөғәт, дин, милләт өсөн янып,
Ҡатнашҡан ул изге көрәштә.
Аҡшан, Салауат тураһында
Драмалар яҙған тәү башлап.
Инанған ул бары өс нәмәгә.
Рухи көс биргән тәхәллүсе - Инан.
- Уҡыусылар, акростих формаһында яҙылған шиғыр юлдарының 1-се хәрефтәрен вертикаль рәүештә уҡып ҡараһак, ниндәй исем килеп сыға?
- Абдулҡадир.
- Ә хәҙер акрошиғырҙың йөкмәткеһенә иғтибар итәйек.
- Кем ул Абдулҡадир Инан? Уның ысын исеме кем? Уның тураһында нимә әйтә алаһығыҙ?
- Эйе, Абдулҡадир Инан Әхмәтзәки Вәлидиҙең арҡаҙашы булған, милли-азатлыҡ көрәшендә тел, милләт өсөн көрәшкән, аҙаҡ Төркиәгә китергә мәжбүр булған, башҡорт батырҙары тураһында тәүге драмалар яҙған, үҙе лә бик рухлы булған, тип әйтелә. Тәхәллүс итеп «Инан» һүҙен алғас, тимәк, нимәгәлер бөтә йөрәктән инанған, ышанған инде.
III. Актуалләштереү. Дәрес темаһына сығыу. Видеоклип ҡарау.
- Был кадрҙар һеҙҙә ниндәй тойғолар уятты? Ошо видеоклипҡа ниндәй исем бирер инегеҙ?
- «Ҡурай донъя яңғырата», «Ҡурай даны».
- Эйе, ҡурай һәм башҡорт айырылғыһыҙ төшөнсәләр.
IV. Төп өлөш. Уҡыу ситуацияһын сисеү.
1. Дәрестең темаһы, маҡсаты әйтелә.
- Уҡыусылар, хәҙер инде бөгөнгө дәресебеҙ нимә тураһында буласағын әйтә алаһығыҙмы?
- Халыҡ тарихы, башҡорт ҡурайы, ҡурайсы тураһында.
- Эйе, беҙ бөгөн Ф.Сөләймәновтың «Тимербай ҡурайсы» хикәйәһен өйрәнербеҙ һәм был хикәйәнең йөкмәткеһе беҙҙең заманда актуаль булып ҡалғанмы икәнен асыҡларбыҙ. Шулай итеп, дәрестең темаһы «Бер йырланым шулай, бер иланым…» тип атала. Дәфтәрегеҙҙе асып, дәрестең темаһын яҙып ҡуйығыҙ.
2. Дәрестең эпиграфын күмәкләп уҡыйбыҙ:
Үлем юрап көлдө юраусы:
Имеш, һуңғы башҡорт ҡәберендә
Ҡурай уйнар һуңғы ҡурайсы!..
Юҡ, үлмәне халҡым!
Рәми Ғарипов. «Урал йөрәге».
3. – Уҡыусылар, хрестоматияның 165-се битен асығыҙ. Хикәйәнең исеменә ҡарап, кем тураһында һүҙ барасағын әйтеп буламы?
Беренсе һөйләмде уҡығыҙ. Хикәйә кем исеменән алып барыла?
Хикәйә нисәнсе йылда яҙылған? Был осор тураһында нимә әйтә алаһығыҙ?
- Беренсе донъя империалистик һуғышы бара. Рәсәйҙә капитализм ҡоролошо урынлаша. Халыҡ бөлгөнлөккә төшә.
- Хикәйә жанрына кем аңлатма бирә ала?
(«Әҙәбиәт һүҙлеге»нән уҡыйҙар. Экранда сыға:
«Хикәйә – тормошта ҡыҫҡа ваҡыт эсендә булып үткән бер генә ваҡиға алынып, уның нимә менән башланып, нисек тамамланғанын бөтөн килеш күрһәткән әҙәби әҫәр»).
- Хикәйәлә, ғәҙәттә, бер нисә герой ҡатнаша, шуларҙың берәүһе генә – төп герой. Ошо геройҙар менән бәйле төп ваҡиға һүрәтләнә, ул бер генә сюжетҡа нигеҙләнә .
- Сюжет ниндәй өлөштәрҙән тора?
- 5 өлөштән: экспозиция, төйөнләнеү, ваҡиғалар үҫеше, төйөнләнеү, сиселеш.
- Әҫәрҙең композицияһына сюжеттан тыш тағы ниндәй элементтар керә? - Портрет, пейзаж, автор характеристикаһы, лирик сигенеүҙәр һ.б.
4. Хикәйәнең сюжет өлөштәрен асыҡлау.
Экспозиция. Кем? Ниндәй? Ҡайҙа? Ҡасан?
- Кем?
- Тимербай ҡурайсы.
- Ниндәй характеристика бирелә?
- Бик шәп, дәртле. Садә, мәрхәмәтле күңелле. Илдең иркәһе.
- Уның кешеләр араһында авторитеты тураһында нимә әйтелгән?
- Уны бөтәһе лә ярата, хөрмәт итә. Уға һәр ишек асыҡ ине. Түрәләр – уға ҡаты бер һүҙ өндәшмәйҙәр ине. Әбейҙәр хөрмәтләп аҡ тирмәгә саҡыралар ҙа ҡымыҙ менән һуғаралар ине.
- Ҡайҙа?
– 1-се абзацта Урал тауҙары һүрәтләнгән.
- Ҡасан?
– Әлегә был урмандарға әҙәм ҡулы теймәгән, ҡәһәрле балта менән бер ботағы киҫелмәгән йәмле, ҡалын урмандар… (XIX быуат аҙағы- XX быуат башы).
- Уҡыусылар, артабан ретроспектив алым ҡулланылған: Тимербайҙың тормошо үткәндәрҙе хәтерләү, һағыныу рәүешендә һүрәтләнә.
- Уҡыусылар, текста йәйләүҙәге иркен, рәхәт тормошто һүрәтләгән өҙөктө кем табып уҡый?
(бер уҡыусы уҡып күрһәтә).
5. Төркөмдәр эшен ойоштороу.
– Уҡыусылар, әйҙәгеҙ, хыялыбыҙҙа ғына булһа ла беҙ ҙә боронғо башҡорт тормошона әйләнеп ҡайтайык!
Һеҙ бер нисә төркөмгә – ҡорҙарға берләшеп, Тимербай йәшәгән осорҙоң
матди һәм рухи мәҙәниәтен тикшерерһегеҙ.
(Һәр төркөмгә тирмә формаһында карточкаларҙа эш биремдәре
Таратыла. Һәр төркөм үҙ аллы эшләй, текстан биремдәргә яуап яҙып ала. Эште тамамлағас, һәр төркөмдән бер нисә уҡыусы сығыш яһай. Уҡытыусы уларҙың эшенә йомғаҡ яһай).
1-се төркөм телселәр. Һауыт-һаба, аш-һыуҙы аңлатҡан һүҙҙәрҙе табып, уларҙың мәғәнәһен һүҙлектән асыҡлай. (Күбәтәләр, һау күнәк, һаба, еҙ ижау. Ҡымыҙ, ҡорот, май, бүкә).
2-се төркөм тарихсылар. Хикәйәнән тарихи ваҡиғаларҙы, шәхестәрҙе табып, яҙып алырға. (Юлай, Салауат батыр, Ҡаһым түрә, Пугачев фетнәләре, ҡалмыҡ яуҙары, боронғо хандар, бейҙәр заманы).
3-сө төркөм этнографтар. Хикәйәнән халыҡтың көнкүреше, йәшәү урыны, байрам, кәсеп-һөнәрҙәре тураһында мәғлүмәттәрҙе табып, уларҙың мәғәнәһен һүҙлектән асыҡлай. (Йәйләү, бейә бәйләү, тирмә, көрәш, бәйге, йүгерек аттар, ырыуҙар – ҡатай, салйот, барын аймағы).
6. Төркөмдәрҙең эшен анализлау.
- Уҡыусылар, һеҙ үҙегеҙҙе бик оҫта тикшеренеүселәр булараҡ күрһәттегеҙ!
7. – Уҡыусылар, хикәйәнең сюжет өлөштәрен барлауҙы дауам итәйек. Һеҙ нисек уйлайһығыҙ, төйөнләнеү ҡайһы урында бирелгән? Нимә ул төйөнләнеү?
- Төп ваҡиғаның башланып китеүенә сәбәпсе булған хәл-ваҡиға, проблема йәки конфликттың барлыҡҡа килеүе.
- 167-се биттә һуңғы абзацты табып уҡығыҙ әле. Был өлөштә ниндәй проблеманың килеп сығыуы тураһында һүҙ бара? Бында ниндәй һүрәтләү сараһы ҡулланылған?
- Көнбайыштан үткен балтаһы, ҡәһәрле бысҡыһы крәҫтиәндең үҙе менән бергә килде. Балта, бысҡы күскенсе халыҡтарҙы сағылдыра. Бында метонимия ҡулланылған, йәғни бер күренеш, әйбер, кешене башҡа күренеш, кеше, әйбергә хас сифат, билдә менән атау.
- Уҡыусылар, ваҡиғалар үҫешен һүрәтләгән юлдарҙы табып уҡығыҙ әле.
- Байҙар, ҡымыҙсы ҡарсыҡтар, «Ҡурай тартсы, ҡунаҡ!» тип торған ҡыҙҙар
юғала бара. Аҡ тирмәләрҙең киң ишектәре ҡурайсы, йырсы ҡунаҡтарға
тарая барҙы. Тимербай заводҡа барҙы, өс йыл эшләне.
- «Тимофейлашты» тигән һүҙҙе нисек аңлатырһығыҙ?
- Рус ғөрөф-ғәҙәттәренә күнекте, кеүәҫ, ҡыярға күнде. Кеүәҫ, ҡыяр – рус
халҡына ғына хас аш-һыу төрҙәре.
- Йәйләү урынында ҡап-ҡара тупраҡ, Йәнтимер кантондың бейә бәйләй
торған ерендә Андрюшка ер һөрә. Был нимәне аңлата?
- Иҡтисади үҙгәрештәр: яңы капиталистик мөнәсәбәттәр барлыҡҡа килгән,
Столыпиндың аграр реформаһы һөҙөмтәһендә башҡорт ерҙәре таланған,
тартып алынған.
- Уҡыусылар, тап ошо осорҙа 1889 йылда рус яҙыусы-ғалимы Глеб Успенский «Бөтә башҡорт, бөтә! Һис шикһеҙ бөтөр был башҡорт!» тип яҙған. Ҡайһы бер милләтселәр: «Һуңғы башҡорт ҡәберендә һуңғы башҡорт ҡурай уйнағанын күрер көндәр яҡынлаша», - тип яҙып сыҡҡандар.
- Хикәйәлә ниндәй күренештәр ҡапма-ҡаршы ҡуйып һүрәтләнгән? Был алым нисек атала?
- Антитеза - контраст алымы, әҫәрҙә төшөнсә һәм күренештәрҙе ҡапма-ҡаршы ҡуйып һүрәтләү.
- Әйҙәгеҙ, ошо урынды схемаға һалып ҡарайыҡ.
Геройҙар Тимербай Ауылдаштары
Хикәйәнең башында
Эш-ҡылыҡ,
тышҡы мөнәсәбәт
Тимербай ҡурай тарта башлай.
Бына «Ашҡаҙар», бына «Тәфтиләү», бына «Ҡаһым түрә», бына «Салауат батыр»… Шаулашып ултырған ағайҙар, шым булып, моңло көйҙәрҙе тыңлай башлайҙар ине.
Эске мөнәсәбәт,
күңел торошо Тимербай ҡурайсы һаман уйнай ине. Һаман моңло, тәрән мәғәнәле көйҙәр менән кешеләрҙең йөрәген ҡуҙғата…
… йәйләү балаларының дәртле, ярһыу күңелдәренең бик тәрән бер мөйөшөндә күмелеп ятҡан асы, ләкин мөҡәддәс тойғоларын уята ине. Моңло ҡурайҙың тәьҫире аҫтында аҡ һаҡаллы ҡарттар йәш быуынға мөҡәддәс тойғоларын күсерәләр ине…
Хикәйәнең аҙағында
Эш-ҡылыҡ,
тышҡы мөнәсәбәт
Ул моңландырып ҡурай уйнай башлай
Ташбулат, Бикбулаттар «Андрюшканан бер бот он һораным», «Гришканан бер әсмуха сәй алып булһа ярар ине», - тип һөйләшә башлайҙар ине.
Эске мөнәсәбәт,
күңел торошо Ҡаһым түрәне, Салауат батырҙы һөйләп, ҡурайын уйнап ҡараны.
Ләкин башҡорттарҙың күңелендә дәрт, моң, мөҡәддәс тойғолар һүнгән ине, туңған ине…
- Уҡыусылар, ошо контраст алымдар менән автор ни әйтергә теләгән?
- Ҡурай юҡҡа сыҡһа, кешеләрҙең күңелендә рух, моң бөтә.
- Эйе, рух бөтһә, тел, ил дә юҡҡа сыға. Ҡурай аша халҡыбыҙ шатлығын да, ҡайғыһын да һөйләгән. Уҡыусылар, ҡурай концептының портретын төҙөп ҡарайыҡ әле. Ҡурай халыҡ ижадында, сәнғәттә, дәүләт атрибуттарында, матур әҙәбиәттә нисек сағылыш тапҡан?
(Уҡыусылар күмәкләп ҡурай концептының портретын төҙөйҙәр).
- Ә хәҙер хикәйәнең кульминацияһын һәм сиселешен табып уҡығыҙ.
- 25 йыл крәҫтиән ағымынан ҡасып йөрөгән башҡорт крәҫтиән өйөндә
үлде. Ҡурай сусҡаларҙң аяҡ аҫтында ҡалды…
- Уҡыусылар, автор хикәйәне шулай ҡапыл ғына тамамлай һәм беҙгә уйланырға урын ҡалдырған. Һеҙ нисек уйлайһығыҙ, Тимербайҙың ғүмере шулай аяныслы тамамланыуында кем йәки нимә ғәйепле?
- Йәмғиәт, яңы ижтимағи мөнәсәбәттәр, уларға яраҡлаша алмаған башҡорт кешеһе.
8. Нығытыу. Проблемалы һорау ҡуйыла.
- Ә хәҙер дәрестең эпиграфына әйләнеп ҡайтайыҡ: хикәйәлә һүрәтләнгән ваҡиғалар, төп геройҙың проблемалары беҙҙең көндәрҙә лә актуаль булып ҡалған, тип әйтеп буламы?
- Телевизор тапшырыуҙарын ҡарап, гәзит-журнал материалдарын уҡып, беҙ хәҙерге заман талаптарына яраҡлаша алмайынса, эскелеккә бирелгән милләттәштәребеҙ тураһында, аҫаба башҡорт ауылдарында сит яҡтан килеүселәр ер алып, тотош урамдар барлыҡҡа килгәнен дә ишетеп торабыҙ.
- Тормош ауырлыҡтарына бирешмәй, ҡуйған маҡсаттарыңа ирешеп, үҙ урыныңды табыу өсөн ниндәй сифаттарға эйә булырға кәрәк?
- Тырыш, уңған, белемле, ныҡышмал, тәүәккәл, ауырлыҡтарға бирешмәҫкә тейешбеҙ.
- Эйе, ошо сифаттарға эйә булғанда ғына тормошта уңышҡа ирешергә мөмкин. Халыҡ шағиры Рәми Ғарипов әйткәнсә, «Юҡ, үлмәне халҡым һәм мәңге йәшәйәсәк!» тип әйтерлек булһын!
V. Рефлексия.
- Дәресебеҙҙең маҡсаты ниндәй ине? Маҡсатыбыҙға ирештекме? Нимә белдек? Кемдәр һәйбәт эшләне? Кемдәр үҙҙәрен маҡтай ала? Ни өсөн?
Кем иптәшен маҡтай ала? Ни өсөн?
Кем бөгөн алған белемен киләсәктә ҡуллана алам, бөтәһен дә аңланым, тип уйлай - йәшел түңәрәк күтәрегеҙ.
Кемгә әле белемдәрен нығытырға кәрәк, һеҙ һары түңәрәк күтәрегеҙ.
Кемгә бөгөн бик ауыр булды, кемгә ярҙам кәрәк – ҡыҙыл түңәрәк күтәрегеҙ.
Бик тырышып эшләнегеҙ, рәхмәт!
VI. Өйгә эш биреү.
- Уҡыусылар, өй эшен ике вариантта бирәм. Үҙегеҙ ниндәйен һайлайһығыҙ, шуны эшләп килегеҙ.
а) Өйҙә «Тимербай ҡурайсы» хикәйәһендә башҡорт тормошоноң бирелеше тигән темаға бәләкәй инша яҙырға.
б) Ф.Сөләймәновтың «Башҡорт йәйләүендә» тигән китабынан башҡа хикәйәләрен уҡып сығырға һәм класта һөйләргә әҙерләнергә.
VII. Йомғаҡлау.
– Уҡыусылар, һеҙ бөгөн бик күп нәмәләрҙе белдегеҙ, иҫкә төшөрҙөгөҙ, төркөмләшеп күп эштәр башҡарҙығыҙ. Киләһе дәрестә осрашҡанға тиклем һау булығыҙ!